Thursday 16 April 2009

الخرف بعينه


يوم السبت لو الشخبطة دى طلعت هاخد 25 درجة


و لو مطلعتش .....صفر

:))

عبط يدرّسون العبط لمن هم أعبط منهم....لنصبح جميعا عبط بشهادات
ـــــــــــــــــــــــــــــــــــــــــــــــــــــــــــــــ
ملحوظة على جنب
بعتذر يا جماعة رميت بوست فى وشكو و مقلتش أنا أصلا ايه الحكاية ده المفروض بنعلق عضلة فى جهاز و بنوفر لها ظروف بتشبه الظروف اللى بتعيش فيها فى جسم الكائن الحى....العضلة دى بتبقا متوصلة بحاجة زى سلك طويل كده بيرسم على اسطوانة سودا....لو العضلة فضلت عايشة و أنت مظبط كل الظروف اللى حواليها هتطلع الشخابيط الموجودة فى الصورة و لو
ماتت هتلبس أنت فى الحيطه
:)
و بعدين دول ما بيقبلوش بأى شخابيط
المهم يعنى......ادعولى أدام الله عزكم

Monday 13 April 2009

مائتان كم فى الاتجاه المعاكس

انطلق بسيارته بأقصى سرعة يستطيع قلبه المريض أن يتحملها...كل العربيات بتقلبله نور...بس المرة دى هو مصمم....مفيش حاجة هترجعه عن اللى فى دماغه...خلصت يعنى خلصت

فرانك سيناترا يعترف بأنه يعلم جيدا أن فرصته فى طلب موعد من حبيبته لا تتعدى حقيقة أنه سيقف فى الصف مع آخرين منتظرها أن تنظر اليه...فقط تنظر....يرفع من صوت الموسيقى ثم يأخذ نفسا عميقا...السيارة ان كانت معبأه برائحة شئ ما ..اذا فهى معبأه برائحة فشله التى صارت لا تطاق....حتى الظربان ستهرب منها ان اشتمتها

مهما حاول..فهو يتهم بالفشل و التقصير فى أى شئ يفعله أو حتى يفكر فى فعله... حياته لا تتعدى كونها
سلسلة من الاخفاقات متوافقة مع بعضها البعض بصورة تثير الاعجاب

يتململ فى جلسته...يغلق عينيه...ثم يترك المقود فى هدوء....هذه المرة هو مصمم ولا شك فى هذا فهو يسير بسرعة 200 كم فى الاتجاه المعاكس

تمر دقائق كدهور..يفتح عينيه ...أى نحس هذا؟؟!؟....ولا حتى عربية واحدة....ولا نص خبطة...جميع السيارات تتفاداه بلا مبالاه مع اطلاق سبة واحدة لا تتغير....يا حمــــار

تتوقف البطارية عن العمل...تجثم السيارة فى وسط الطريق و تعلن امتناعها التام عن الحركة حتى و لو لنصف متر...يترجل من السيارة...يعطى ظهره لها....مرة أخرى يأخذ نفسا عميقا ليجد نفسه يسير مع القطيع


انتهــت

ــــــــــــــــــــــــــــــــــــــــــــــــــــــــــــــــــــــــ
ملحوظة لابد منها

لكل الناس الحلوة اللى كانت عايزه لينك قصاصات صالحة للحرق

http://dvd4arab.wordpress.com/2007/03/28/%D9%82%D8%B5%D8%A7%D8%B5%D8%A7%D8%AA-%D8%B5%D8%A7%D9%84%D8%AD%D8%A9-%D9%84%D9%84%D8%AD%D8%B1%D9%82/

مش عارفة أنا ايه اللينك الطويل ده ......بالهنا و الشفا

Monday 6 April 2009

ثم قال لى ليكى تاج عندى

زى عوايدى دخلت على المدونة أشوف التعليقات.....شغالة تقليب فى دماغى يمكن ألاقى حاجة هنا ولا هنا أتكلم فيها.....بس دماغى واقفة عن العمل حتى اشعار آخر

لاقيت تعليق من حسام غانم بيقولى فيه بعد سلامات و ازيك....ليكى عندى تاج

أوبااا....حسيت انى اتبدست.....بس فرحت لأنى هأبعبع.....و البعبعة لا تؤدى لشئ سوى الراحة

زى ماحنا متفقين من التاج اللى فات....اربطوا الأحزمة....على من يرتدى العوينات أن يجلب خاصته و يرتديها...ممنوع التدخين لمن هم دون ال18

يالا بقا نبعبع

اسمك؟
أمانى نبيل

المشهور بيه وسط أصحابك؟
مونى.....أومانى....مانى

فى الغالب اللى نفسه فى اسم حتى لو مالوش علاقة باسمى بيقوله

سنك؟
19 

اسم مدونتك؟
كلمتيـــن و بس

مجال دراستك؟
الصيدلة.....ربنا يكفيكوا الشر

الصورة الرمزية لمدونتك بتعبر عن ايــه؟
عن شكلى لما بصحى من النوم الصبح.....
:)

هل فكرت فى اغلاق المدونة؟ و السبب؟
لأ...

ايه رد فعلك لو حد قل أدبه عليك فى التعليق؟
أكيد هتضايق...بس فى الأول و فى الآخر أنا مقتنعة ان أفعال الشخص بتشاور عليه بصورة أو بأخرى
كده كده هيسكت بعد فترة فأتجاهله أحسن

أسوأ مدونة؟
مش فاكرة اسمها....كانت بتاعه واحد مقتنع ان كل البشر بقر و ان الحل الوحيد هو الابادة الجمـــــاعية عشان يرتاح من أشكالنا




هيحصل ايه للايميل بتاعك بعد مــا تموت؟؟
يا ساتر يا رب.....ولا حاجة...هيعدى عليه شهرين تقريبا و حسابى بعدها هيتقفل و كل الناس اللى عليه هيعرفوا بطريقة ما انى قابلت وجه كريم


اديت الباس وورد بتاعك لحد قبل كده؟
مــرة لصاحبتى عشان تفضى ايميلات من عليه
و بعدها غيرت الباس...و محدش يعرفها من وقتها غيرى


السفر بالنسبة لك؟
روحى فيه....مشكلتى انى مبسافرش كتير برغم انى بعشق السفر
بطلنا نسافر فى الصيف من سنتين و من وقتها و أنا مبحبش الصيف
بس بعدها اتعودت انى أروح القاهرة أغير جو و وشوش كل فترة...

أمنيتى الوحيدة انى يبقالى فرصة ألف العالم كله و أتعرف على كل أجناس الأرض و أعرف كل حاجة عن حياتهم و بعدها يحصل اللى يحصل بقا

المود بتاعك؟
متقلب جدا و عشوائى....أنا شخصيا مبفهملوش

بتعمل ايه فى وقت فراغك؟
وقت فراغى يا سيدى....طبعا بعمل أجدعها كوباية شاى.....و لو جايبة كتاب جديد بقعد أقراه...لو مفيش كتب جديدة يبقا كتاب قديم بحبه مقريتهوش من فترة طويلة و أشغل مزيكا رايقة فى الخلفية
ساعات أدور على النت على مقالات جديدة لأحمد خالد توفيق
أتفرج على فيلم حلو.....أوقات أقلب فى كراكيبى القديمة
أطلع أقعد على السطوح و أرسم شوية....أكتب....أو أقعد من غير شغلانة لو المود مش تمام
ممكن أغلس على القط بتاعى لو قاعد رايق

الأكلة المفضلة؟
مكرونة بالبشاميل
محشى كوسة و فراخ
بيتزا
جلاش باللحمة المفرومة أو بالجبنة الرومى و الزيتون
مكرونة بصوص البشاميل....أو بصلصة عادية بس تبقا معمولة حلو

أوووووف....أنا كده جعت

الصفات اللى ورثتها من والدك؟
تكبير الدماغ....و انى أحسب الموقف من كل النواحى و بجميع الاحتمالات

الصفات اللى روثتها من والدتك؟
سياسة النفس الطويل....و ممكن الصبر بس العصبية مش مساعدانى فى موضوع الصبر ده

أكتر ست حاجات بتكرهها؟
متقوليش ستة.....
قولى ما بتكرهيش ايــــه
:)
الغباوة و الأغبياء والمتذاكين
النفاق
الظلم
اللى بيتعامل معاك من منطلق انه أكثر مالا و أعز نفرا بمعنى أنه أسمى فكريا....ثقافيا....دينيا.....علما أو خلقا...النرجسيين عامة مبطيقهمش
الكذب
استغلال السلطة
المتحمسين بتعصب....المتفاءلين بتعصب....و كذا المتشائمين بتعصب...من الآخر بكره التعصب بكل صوره

أكتر ست حاجات بتحبها؟
الكتب و القرايه
السفر
تصليح الحاجات حتى و ان بوظتها أكتر
المزيكا
اللمة الحلوة بكل ما تحمل الكلمة من معانى....يعنى لا الناس تبقا قاعدة كارهة بعض و لا قاعدين بنجيب فى سيرة حد....ولا فى أغراض ملهاش لازمة من اللمة
أتعلم لغة جديدة


شخصيتك نوعها ايــه؟
عصبية....ملولة...كسولة..ساخرة...صريحة ...مرحة على ما تفرج

لماذا دخلت عالم التدوين؟
عشان ألاقى مكان يبقا بتاعى...أحط فيه أفكارى من غير ما حد ينتقدها..يزدريها أو يقولبها
و أشوف الناحية التانية من العالم....أشوف الناس اللى فى سنى و اللى اكبر منى دماغهم شكلها ايه
داخلة بغرض انى أشوف و أستفيد و أتعلم

أجمل كلمة قيلت فى وصف مدونتك؟
ان كلامى بيوصف ناس كتير و ان أسلوبى على طول بيتطور

أهمية التعليق بالنسبة ليك؟
بيخلينى أفكر الكلمة اللى كتبتها اتفهمت بكام شكل و لمست كام وتر

أحسن بوست كتبته و ليه؟ضع اللينك
أعتقد ان الأحسن لسه مكتبتوش....بس أنا بحب أنا و أنا بشرطة.....شيزوفرنيا .... لا شئ حقا لا شئ....فيروز و قطة و قصر الشوق...ادخل برجلك اليمين....شخابيط شخصية جدا

لأنى كتبتهم بمزاج و طلعوا من مواقف عشتها فعلا


أفضل بوست قرأته ؟و أفضل مدونة؟
حكايتى عند أنونيمس
بيان هام عند واحد مش فاهم حاجة
القاموس عند آدم المصرى
الأفكار البيض و أقاربها السود عند احنا بتوع الفنكوش
و أحسن مدونات قابلتها لحد دلوقتى هما اللى موجودين عندى فى لينك ناس عندها دماغ على ايدك اليمين

الانترنت بالنسبة ليك ايه؟
شباك بشوف بيه الناس الناحية التانيه بتعمل ايه

تمرر التاج لمين؟
لكل الناس اللى عينها فيه

بس خلاص...