أرجع و أقول أهى شخابيط

لا أعتقدها بجودة الجزء الأول منها و لكن أرجع و أقول أهى شخابيط

ليست المشكلة فى أن تقف على قدميك بعد وقوع دام....المشكلة فى أن تكتشف أنك تقف وحدك

جميل أن تتأكد شكوكك...قاس جدا أن تكون جميع شكوكك منحصرة فى خراب بيتك

لن تعرف أبدا ان كنت أنت من يبرز الأسوأ فيمن حولك....أم هم الذين يبرزون الأسوأ فيك

لنضع الأمور فى نصابها الصحيح....لا أستشعر لذة للنجاح عندما يكون معتادا مكررا...باهتا بذات الصورة...أصدقه أكثر اذا انتزعته من بين الفشل و من وسط آلاف الاحباطات

أكره جيرانى...ليس لأنهم مزعجين...اجتماعيين بافراط...و لا حتى لأنهم متطفلين...فهذا هو المعتاد من البشر جميعا...أكرههم لأنهم متسببين فى قطع المياه من يومين

أستيقظ...أتأمل وجهى جيدا فى المرآه....لم أر ما هو أكثر جمالا...عمل فنى رائع...الناموس تفوق على نفسه..لم أر تطريزا بهذه البراعة من قبل

نحن نأمل فى الأفضل ليس لأننا حمقى...بل لأننا ساذجين نستميت فى محاولة اثبات عكس ذلك لأنفسنا

سيصير كل هذا السخف جزء من ذكرياتى...هذا مؤكد...كونه سيكون جزءا سارا أم أسودا كئيبا...فهذا هو ما ستثبته الأيام القادمة

أنتوا مستهترين...هكذا ختم الدكتور الفلانى حديثه عديم النفع معى....لمجرد أنك نجحت فى تحويل كبتك النفسى الى ما تسميه أنت الآن مركز اجتماعى مرموق ...هذا لا يمنحك الحق بتاتا فى أن تحكم على بأننى مستهترة...هكذا أنهيت أنا حديثى معه...فى رأسى طبعا

لأول مرة فى حياتى أشعر بهذه السعادة عندما أنظر الى الساعة...كون أن الساعة الوحيدة الموجودة فى غرفتى معطلة أمر مريح للأعصاب بشكل لا يصدق

أصبح معظم من أعرفهم مستبصرون...يتنبأون برسوبنا فى المادة الفلانية أو العلانية...حسنا ان كان الأمر كذلك!...لم أنتم مصرون على شراء كل هذا الكم من الأوراق و تكديسها و السهر على دراستها حتى صباح اليوم التالى....لا أفهم

________________________

ملحوظة على جنب

أنا كمان هحاول أتعادل مع المنطق و أكسب كاس أمل مكسور

مصطفى(صاحب مدونة واحد مش فاهم حاجة)...البوست اهداء ليك

عندما يصبح كل شئ مؤلم للأسنان

تعريف

عـــرف أحد علماء النفس الجنون بأنه تكرار نفس الفعل مرة بعد أخرى متوقعا فى كل مرة الحصول على نتيجة مختلفة

موقف

بعد محايلة طالت...قررت أن أجلس مؤخرا أمام الكتب فى محاولات أرجو ألا تذهب سدى لانقاذ ما يمكن انقاذه...أقنعت نفسى..أخذت القرار...ذهبت للمطبخ(آه للمــــطبخ) لآخذ زجاجة المياه و أذهب لأستذكر شيئا ما فى غرفتى.....أجرع جرعة ماء من الزجاجة و أىىىىىىىىىى....سنانى بتوجعنى بشكل غير طبيعى....أسنانى حساسة مش مشكلة....مكملتش ثانيتين....و بدأ صداع نصفى..مش مشكلة...مسكن و هبقا زى الفل....المهم المذاكرة....أنا فدا المذاكرة.....كبسولة كيتوفان و ستنتهى جميع آلامى و ستتناثر أشلاء المناهج على الأرض...سأذاكر كما لم أفعل من قبل....نيااهاهاهاه

هيهااااااااات......ساعتين و المسكن معملش حاجة....طيب ناخد قرص تانى.....ساعتين كمان...كل ده و الورق بيرقص طربا على المكتب...بيتحدااانى...طيب هنام ساعة و أقوم أكمل....نمت و قمت ...الصداع ازدادت حدته

يومين كاملين من الصداع النصفى و أجمعت آراء من فى البيت على انه صداع عصبى لأنى نرفوزة و روحى فى مناخيرى.....مريت على جميع أنواع المسكنات ابتداء من البروفين و انتهاء بالترامادول عشان أنام ......بس أقدر أنام

كل ده و الورق على المكتب لسه محدش لمسه.....و أعتقد ان ده زودلى الصداع أكتر....انتهى الصداع و ابتدا ألم الأسنان....أربع أيام أخرى من بلبعة المسكنات فقد فيها جميع أفراد البيت أعصابهم من محاولاتهم المستميتة لاقناعى بانى أروح لدكتور أسنان بدل ما يجيلى قرحة.....أخيرا انصعت لضغط الجميع و ذهبت للطبيب....متحفزة تماما....لو سمعت منه كلمة مسكن هقتله....أنا مش طايقة أشوف أى دوا مسكن

العيادة أخيرا.....تكاد لا تميز ملامحى من بعضها من التكشيرة.....لا أعتقد أننى فى حياتى بدوت أكثر لؤما و ارهاقا و اعياءا و كرها لحياتى....طفلتان منهمكتان فى اللعب.....صخب شنيع....كل دور والدتهم كان ينحصر فى تقاااااا عيب كده يا بنت...متخضيش أختك.....تقااااا اسكتى أنا صدعت....كل اللى فاكراه ان بعد فترة البنت الصغيرة اللى هيا تقا يعنى بصتلى كده و شافت تعبير وشى و توقفت عن اللعب لحد ما سبت العيادة و مشيت

اكتشاف

بعد الآشعة و الذى منه اتضح ان ضروس العقل الأربعة قرروا يطلعوا مرة واحدة....و فى واحد منهم قرر يطلع معووج...و نظرا لأن فكى صغير فده كان سبب عذابى طول الأسبوع اللى فات

الحل

الدكتور قاللى حلك الوحيد انى أشيل الأربع ضروس...واحد...واااحد....و مينفعش الموضوع يستنى

استدراك

نسيت أقول انى مقربتش للورق غير النهارده بليل....و مكملتش خمس صفح على بعض....و باقى بالظبط أسبوعين على اول امتحان نظرى

ما يشبه الاعتذار

لو كان هذا البوست مخيب للآمال على أى مستوى....بعتذر

اعلان

عندما يعود عقلى من اجازاته السنوية...أعدكم بأن أكتب شيئا أكثر تشويقا

ــــــــــــــــــــــــــــــــــــــــــــــــــــ

بــــــس خلاص

ــــــــــــــــــــــــــــــــــ

تحديث فى قمة الأهمية

لا مش بس خلاص....أنا مبسوطة خالص

ربنا كريم جدا و رحيم جدا...مشكلة ضروس العقل لفتت نظر الدكتور لمشكلة فى عصب ضرس عندى....و الحمد لله شلت الضرس اللى فى مشكلة فى العصب بتاعه النهارده و الدكتور وسع لضرس العقل و الدنيا بقت تمام

تخيلوا أنا لو مكنتش شلت الضرس ده كانت تقريبا كل الناحية الشمال من فكى هتبوظ

الحمد لله ...رب ضارة نافعة

أبو الفناكيش.....بركااااااتك

:))