أتأمل الساعة فى هدوء....الحادية عشرة و تسع و خمسون دقيقة....تسعة عشر عاما بالتمام و الكمال باستثناء بضع ساعات اختصروها عمدا من عمرى لسبب تافه اسمه التوقيت الصيفى و الذى أحيانا يتنكر فى هيئة توقيت شتوى...تسعة عشر عاما كاملة مرت من عمرى و لا يعلم سوى الله ان كان مقدرا لتلك الروح أن تمكث فى هذا الجسد النحيل مثلهم أو حتى ما يقاربهم
أذكر أننى و أنا فى الثامنة اعتقدت أننى لن أصل لعامى التاسع عشر لأن الطريق اليه بدا طويلا مرهقا ملئ بالمفاجآت... و أنا بالمناسبة لا أكره شيئا بقدر كراهيتى للمفاجآت... و لكن شاء الله أن أصل اليه.....وصلت اليه و أنا مازلت طفلة لا تتعدى الثمان سنوات أيضا...يصعب عليّ فهم العديد من الأشياء....يصعب عليّ وضع بعض الأمور فى نصاب مقبول لدرجة تدفعنى أحيانا الى الدبدبة فى الأرض وعقد حواجبى فيما يشبه النول اللى كنا بنعمله بالعافية زمان فى حصة التربية الفنية
و كأى بشرى تدفعنى نرجسيتى دوما لأكره فكرة أننى بعدما سأرحل ستستمر الدنيا و كأن شيئا لم يكن....يصعب على أن أعى جيدا أننى لن أكون متواجدة فى مكان ما أفعل شيئا ما....ربما لهذا السبب جميعنا نهاب الموت....لأننا لم نألف سوى الحياة
الخلاصــة يا سادة
النهارده عيد ميلادى.....و اكتشفت بعد الغوص فى نفسيتى قليلا فى السنة الأخيرة انى مليش نفس بجد غير فى التالى
أنا نفسى فى حاجة واحدة بتمناها من ربنا ....انى لما أقف للعرض عليه...ينظرنى ....و يقولى أنا مش زعلان منك.....ارتضيتك من عبادى
و بصراحة مش دى بــس
نفسى كمان أعمل حاجة تفيد الناس و يفتكرونى بيها و لو حتى بعد ما أمشى بسنة......نفسى اللى باقى من عمرى هو اللى يدخلنى الجنة
امبارح ايدى وقعت و أنا بدور على كتاب على الدعاء ده
يا من تنشئ من العدم ما يصير موجودا
بكلمة صيرت الكون كونا
وبكلمة تصير الدنيا هباء منثورا
اجعلنا نبدأ فى ترك كل مالا ترضى الى ما ترضى
واجعلنا نبدأ فى حساب أنفسنا قبل أن تحاسبنا
فنعمر الأرض كما أمرتنا و لانخربها كما يريد الشيطان و شرور أنفسنا
و نبدأ فى العمل لآخرتنا و لا تكون الدنيا أكبر همنا
فترضى عنا يوم أن تبعثنا فنجنى رضا محبتك لنا
آميـــــــــــــــن يا رب
ــــــــــــــــــــــــــــــــــــــــــــــــــــــــــــــــــــــــــــــــــــــ
ملحوظة على جنب
عارفة ان البوست قد يكون كئيب شويتين بس ده تفريغ لأفكار كنت بقلّبها فى دماغى لوقت طويــــل جدا
أنا دلوقتى بقي عندى عشرين سنة......خبط لزق كده
أنا شخصيا حاسه الرقم واسع عليا شوية
أعتقد مع مرور الوقت شوية هاخد عليه
المهم يعنى كل سنة و أنا طيبة
بالاذن أنا بقا
هروح أشوف حاجة آكلها فى المطبخ
:))
8 comments:
كل سنة وانتى طيبة وعقبال 1000 سنة انتى شخصية طيبة وحساسة واكيد ان شاء اللة يكون راضى عنك
تاني بوست عن عيد ميلاد الاقيه حزين :(
كل سنه وانتي طيبه يادكتوره
وان شاء الله تحققي الي بتحلمي بيه
واميييين يااارب
ولو لقيتي حاجه حلوه ف المطبخ هاتيلي ;)
كل سنة وانت طيبة يا أماني
fالعكس البوست مش كئيب
وشايف روح حلوة وبتفكر بتستقبل سنة جديدة
كل سنة وانتى بخير وصحة وسعادة
وعقبال المليون سنة وافتح المدونة الاقيكى كاتبة بوست جديد
Anonymous:
و أنت/ى طيب/ة......و ربنا يرضى عننا كلنا
ـــــــــــــــــ
Mony:
و أنتى طيبة يا سكرتى
يارب تكون امتحاناتك عدت على خير و نسمع منك أخبار حلوة عن النتيجة ان شاء الله
و بالنسبة للحاجة الحلوة....أنا مستنياها منك المفروض
عيد ميلادى بقا و بتاع
:))
نورتينى
ـــــــــــــــــ
حسام
و أنت طيب و بكل خير يا حسام
منورنى
ــــــــــــــــــ
مصطفى
و أنت طيب و بخير دايما يا مصطفى
ربنا يرضى عننا كلنا
منورنى كالعادة
:))
كل سنه وانتي زي مبتتمني واحسن
كل سنه وانتي قريبه من ربنا ومحققه كل احلامك
كل سنه وانتي سعيده من قلبك
ومبروك عليكي ال 20 :)
ليكوريكا
و أنت طيب و بخير و تسلم على كلامك اللى زى السكر ده
و يارب نشوف نتيجة عدلة السنة دى...و تتخرج على خير ان شاء الله
منورنى
:)
و كأى بشرى تدفعنى نرجسيتى دوما لأكره فكرة أننى بعدما سأرحل ستستمر الدنيا و كأن شيئا لم يكن....يصعب على أن أعى جيدا أننى لن أكون متواجدة فى مكان ما أفعل شيئا ما....ربما لهذا السبب جميعنا نهاب الموت....لأننا لم نألف سوى الحياة
دقات قلب المرء قائلة له ... ان الحياة فيمتو سكند و نانوات ثواني
عموماً ألف مبروك و كل عامٍ و أنتِ الى الله أقرب و على طاعته أدوم
و أهلا بكِ الى نادي المسنين ههه أطفال فوق العشرين
ولا يهمك الهموم تنبح و نحن نسير
Post a Comment