Friday 23 April 2010

كلام لا يودى ولا يجيب

أصبحت لا أتذكر الكلية الا كل يوم أربعاء.....تجدنى فى مساء يوم الثلاثاء أذهب لغرفتى فى توجس و أنظر الى النتيجة لأتأكد أن اليوم هو الثلاثاء فعلا....ثم أتحقق من الموبايل و أنطق بجملتى الشهيرة آاااه يعنى بكرة الأربع....-بديهى جدا أن يكون اليوم التالى هو الأربعاء- ولكنه لمن لم يلحظ نوع من التضجر...أستيقظ فى تمام السابعة و النصف صباحا فى حالة تشبه النشاط الى حد ما....أذهب لأطمئن على أمى و ألقى عليها هى و أبى تحية الصباح و تجدنى بعدها أتجول لمدة نصف ساعة فى الشقة بلا هدف ثم أبدأ روتينى الأربعائى فى تمام الساعة الثامنة...أمامى ساعة حتى المحاضرة..أتلكأ يمنة و يسرة لأننى أريد ذلك و أخرج حوالى التاسعة الا خمس دقائق

محاضرة سريعة و أحيانا يتبعها سكشن ثم أقابل أصدقائى....أحيانا أمر بكلية الطب فى طريقى....و هناك يبدأ المرح

أحد معارفى:ازيك..........وحشااانى
أنا:تمام الحمد لله....أنتى ايه أخبارك
هى:قريت فاتحة.....باركيلى
أنا:مليون مبروك....ربنا يتمم بخير
هى:ورينى ايدك اليمين كده
أنا-بسذاجة-:ليه ...خير؟؟...فى حاجة
هى-تبدو و كأنها قد حاصرت فأرا فى ركن-:أشوف كده ...يكون فى دبلة هنا و لا هنا
أنا:لا لسه ايدى زى ما ربنا خلقها متغيرتش
هى:طول عمرك فقرية
أنا -مبتسمة- :ملقيتش رد أقوله بصراحة

أسير ما يقارب العشر خطوات.....ليبدأ مرح من نوع جديد

بعد ازيكم و سلامات

أحد معارفى:و أنتوا كده لسه متخطبتوش
دينا صديقتى:لا لسه
هى:خليكوا أنتوا كده كل الناس عمالين يتخطبوا و أنتوا قاعدين
أنا:أصل احنا ملناش فى الكلام ده
دينا:احنا أصلنا بنحب نتفرج و نتعلم
أنا:آه صحيح......و احنا اتعلمنا كتير من الفرجة
نتبادل أنا و دينا ابسامة خبيثة بعض الشئ
هى-أحد معارفى-:ده احنا عندنا الناس اتجوزت و أنتوا لسه...فين أنتوا من اللى بيحصل
دينا و أنا فى نفس النفس-بنوع من السماجة-:و أنتى فين من اللى بيحصل
هى: لا أنا لسه المشوار قدامى طويل الدور و الباقى عليكوا
تختفى بعدها و لا تترك لنا فرصة للرد

أمضى بعض الوقت فى كليتى و يدفعنى حظى التعس بعد فترة لأمر من هناك مرة أخرى و لكن هذه المرة وحدى

و فاصل أخير من المرح

أحد معارفى:ألف مبروووووك يا جميل و الله فرحتلك
أنا - ببلاهة-:هو أنا عملت حاجة....فى حاجة
هى:آه يا بنتى مش اتخطبتى ورينى ايدك كده
أنا -فى داخلى-:تصدقوا بقا انكوا رايقين
أنا-بصوت مسموع ممزوج ببعض الاستخفاف-:أنا...اتخطبت....امتى....محدش قالى حاجة عن الموضوع ده
هى-يعلو الاحراج و جهها-:طيب....أنا.....أنا
أنا-مستمتعة جدا بشكلها و هى محرجة-:ايه يا بنتى عادى عادى....تلاقى حصل عندك خلط و لا حاجة
هى-باحراج يزداد-:ده أنا حتى باركتلك على الفيس
أنا-أضحك فى استمتاع-:يا ستى مش أنا والله....أنتى أكيد خلطتى الأشكال بالأسماء
هى:أنا آسفة فعلا....أنا مش عارفة أقول ايه
أنا:و لا يهمك... بتحصل
تحيينى فى احراج و تمضى مهرولة



من يعرفنى جيدا يعرف أننى لست من دعاة الفيمينزم....و أيضا لست من (المدلوقات) على الزواج...اعذرونى فأنا لم اجد لفظة أخرى...لست ممن يتزوجون لأنهم لا يجدون ما هو أفضل لفعله...لست أيضا ممن يجلبون أطفالا لا ذنب لهم الى هذا العالم لمجرد أن الخطوة المنطقية بعد الزواج هى الانجاب....كما أننى مقتنعة تماما بأن ربط حياة شخصين عمرهم لا يتعدى العشرين عاما ارتباط –من المفترض أنه- أبدى هو ظلم للطرفين حتى و ان كان برضائهم....أى عقل مكتمل النضج هذا الذى ستجده فى مراهق؟!!....أى نفس تخلو من الانانية هذه؟؟...لا أفهم
....و لا أتصور أننى سأعقد سلاما مع هذه الأفكار قريبا


بالطبع لا أجرؤ على النطق بهذا ....و الا اعتبرونى مخبولة و أستحق جناحا باسمى فى العباسية



أجلس أمام التلفاز...لأجد الممثلة الفلانية فى دفاعها المستديم عن مشاهدها فى الأفلام التى لا تحمل رسالة واضحة....سوى أن العالم يعج بالشرور و أننا فى بحث دائم عما هو أسوأ بكامل ارادتنا...تقول الممثلة اياها...أنا مشاهدى موظفة دراميا -كالعادة-...لا يخجل منها أى شخص...و بعدين متحاسبنيش....حاسبى الشخصية....احنا ليه بنرجع لورا بتفكيرنا....ده فن ....تتحدث المذيعة قليلا عن الشخصيات لتحاول أن تزيح بعض اللبس الذى يحدث للمشاهد فيجعله لا يفهم ماهية الشخصية....فتعود الممثلة لتقاطعها...ايه ده أنتى بتحللى الشخصية و بتسألى هى بتعمل كده ليه....الرواية مكتوبة كده...أتأفف و أغير القناة....لأجد فيفى عبده تدافع عن قضيتها الخاسرة التى لا تسأم من التشدق بها.....مالهم الرقاصات...احنا أشرف من ناس كتير بيعملوا الغلط فى بيوتهم!!!!....أتافف زيادة...و أغلق التلفاز....اذا كنتى مقتنعة بما تفعلين لهذا الحد....لم تقارنى نفسك بالآخرين و الذين هم -بالمناسبة-الأسوأ من وجهة نظرك


مش لاقية كلام أقوله غير انى متغاظة من البنى آدمين اللى فاصلين دماغهم عن تصرفاتهم



7 comments:

Unknown said...

انا ضحكت ضحك مالنوع الشرير اثناء القراءة لانى اعتقد انى عندى خلفية عن موضوع الفيمينزم حسب ما سمتية او المدلوقات حسب ما وصفتية منكرش انى كنت بتعامل مع الموضوع دة بطريقة عدائية فى الاول بس بعد كدة اتعاملت معاة على انة فكرة او طريقة تفكير ومينفعش اتعامل مع اللى عكسى فى التفكير بعدائية والا ابقى اخدت لقب متطرف فقررت اتعايش مع الوضع بسلام


على جنب

شايف غول سخرية او ( بدور على لفظ تانى غير غول ) ممكن نقولها حد متمكن اوى من الكتابة الساخرة بيكبر هنا فى المدونة

OldCatLady said...

واحد مش فاهم حاجة:
أنا فعلا فى مرحلة سابقة كنت بتعامل مع الموضوع بعدائية أحسد عليها...لدرجة ان الناس كان بتفهم انى مدلوقة عليه و عشان كده بتصنع العكس...لكن مؤخرا اتعلمت ان الجواز اختيار من ملايين الاختيارات المتاحة و لكنه مش الاختيار الأوحد ...مش حاجة مصيرية أقصد....مبتعاملش مع اللى بيفكروا عكسى بعدائية اطلاقا...لأنى متأكده اننا مختلفين فى النظرة للموضوع مش أكتر و لو دعبست شوية هلاقى اننا مختلفين فى مليون حاجة تانية مبيظهروش على السطح بنفس القدر زى موضوع الجواز


على جنب
شهادة أعلقها فى دماغى

تحياتى
تسلم

max.adams said...

من أول مرة فتحت فيها مدونتك و بعد قراءة أول بوست ، و قرأت " تعليقك هنا و لا تحاول الهروب " باكون نفسي أكتب في التعليق " أنا مش هاهرب ولا حاجه " بس مكتبتهاش لسبب ما لا أتبينه حتى الآن

... أما عن موضوعك
و الكوميديا المتكرره اللي بتعيشيها ، فدا متفشي في المجتمع بأكمله ،، و تتكرر الكوميديا مع الشباب بنفس الوتيره مع اختلاف ال
" GUI "
المستخدمة ، نظراً للفارق الطبيعي بين الذكور و الإناث ،، و بالطبع أحصل على أحلى تعبيرات و مشاهد مضحكه ، عندما يدرك من هو أمامي أن الزواج ليس من مخططاتي الخمسية و يقولون ،
ليه كده يابني هو ده مش سنه برضو ؟؟ دا حتى عشان عيالك يكبروا قدامك ،

و قطعاً لو طاوعتهم ، مش هلاقي فرصه ألف مصر محافظة محافظة و بلد بلد ، و مش هلاقي وقت أتعلم غطس ، و مش هاشوف الصحاري السوداء ولا الصحاري الكريستاليه في غرب مصر ، و طبعاً مش هاعرف أشتري حتة الأرض اللي بحلم بيها في العريش
دا غير اللأسباب الغير معلنه ،،
و بعد الرد ده ،،، أحلى تتنيحة على أحلى وش مصري قمحي
:))))))

أنتي ثاني من رأيت من بنات حواء المصريات ، تفكر بهذه الطريقه
لك تحياتي

OldCatLady said...

زعيم فنكوشيا:

أنا فعلا متنحة...مش كل الناس عايزة تلف مصر من شرقها لغربها...فى ناس عايزة تخلع و تسيبها خالص عشان تلف براها...مش كل الناس عايزة تتعلم غطس و مش كلهم عايزين يشتروا حتة أرض....مش عارفة أعمل حاجة غير انى أبتسم ابتسامة عريضة جدا

الفكرة مش فى انك تطاوعهم...الفكرة انك تفنعهم ازاى يسيبوك فى حالك :))

مكنتش أعرف حاجة عن الصحارى السوداء والكريستالية...دورت عليهم على النت..ملقيتش حاجة كالعادة..

سؤال جانبى كده
ايه ال GUI ده..قد يبدو سؤال أبله...لكنه على الأقل له اجابة :))

تعليقك هنا و لا تحاول الهروب مقصودة بلهجة تقريرية....قد يصعب الرد عليها أحيانا


نورتنى..
تحياتى

max.adams said...

و ماله ،،
فكره حلوه ، أحاول أخليهم يسيبوني فـ حالي يمكن تفلح

بحكم أني درست جيولوجيا و ميكانيكا تربة ، لزوم الأساسات و خلافه ، فـ الدكتور المسؤول عن الماده ادانا فكره مبسطه عن الصحاري السوداء ، من كتر الحديد اللي فيها ، و الأخرى الكريستاليه التي لا تقدر قطع صخورها بثمن
و طبعا مدفونه فـ قلب الصحراء الغربية ،، حاولي تدوري بكلمات بحث انجليزي يمكن تلاقي

:) G.U.I Graphical User Interface
بالعربي .. واجهة المستخدم الرسومية
اللي هي موجوده في البرامج علشان نعرف ندخل بيانات و نستلم نتايج ،، زي ما ممكن نفس البرنامج و نفس الوظيفة بأشكال مختلفه
ال Themes
يعتبر تطبيق مبسط للموضوع ده

و أنا اتنورت بابتسامتك العريضه ، و حسيت أن الأهداف دي معقوله لنوع ما من البشر

:)

heba said...

طيب أنا مش معاي 40 قرش بس برده هعلق وأتكلم من قلبي عشان الموضوع دخل دماغي

أنا بفكر بنفس الطريقة وأعتقد إن العزيز فنكوش أشار إلى هذه النقطة في تعليقه الأول

ولكن كيف لنا أن نحارب مجتمعاً بأكمله يقوم بتربية البنات على أساس إن نهاية كل بنت هو بيت زوجها "العدل" بكسر العين والدال ولكن الشائع أنها تنطق بفتح العين والدال

بلا استثناء .. الناس معتقدة ان مصير كل ولد وكل بنت هو الزواج بغض النظر مين هو الزوج أو مين هي الزوجة .. بيفكروا ازاي .. ايه هو أسلوبهم في الحياة .. يكفيهم دائماً وللأسف ان هو بيشتغل شغلانة كويسة وعنده شقة كويسة وخلاص .. مبيحطوش في بالهم أبداً ولا في حساباتهم البعد الرابع للزواج

وعشان تحاولي تتكلمي في الموضوع ده وتشرحيه عشان يفهموكي ويسيبوكي في حالك .. علطول وفوراً يتهموكي بالهرطقة وبالعزوف عن الزواج ومش بعيد بتهموكي اتهامات شنيعة تفتقت عنها قريحتهم السوداء العطنة

شكراً يا صيدلانية .. أسلوبك رائع

OldCatLady said...

أبو الفناكيش:

كده انا فهمت

ابتسامة عريضة
ـــــــــــــــــــ
هبة:

عشان خاطرك هخليها نص جنية...و لا تشغلى بالك

تمام تمام تمام....أنتى أوجزتى الموضوع كله فى كلمتين

بيعة و شروة....وأغانى مستفزة و يا ريت الناس بتحب بعضها.....اللى مضايقنى ان الجواز فاقد لمعنى السكن زى ما ربنا وضحهولنا ببساطة شديدة فى القرآن

كان أبسط اتهام اتقالى انى معقدة :)

منورانى يا هبة و نفسى أشوفك هنا تانى