ما بين جملتى ماليش فيه يا علاء -التى قالها يوما الفريق أحمد شفيق لعلاء الأسوانى-....و الجيش مستهدف -التى قالها اللواء محمود حجازى فى تعليقه على أحداث ماسبيرو موجها حديثه لمنى الشاذلى و إبراهيم عيسى و الشعب المصرى-...إحتفظ المجلس العسكرى بموقعه المتميز الذى يثير حالة عجيبة من البلاهة داخل أى مواطن طبيعى
المفروض يعنى المواطن يحط فى بطنه بطيخة صيفى لما يسمع من عضو فى المجلس العسكرى إن الجيش مستهدف؟!؟
رواية إن الجيش و الأقباط مستهدفين رواية مطاطة جدا و من أسهل ما يكون ...لأن أسهل حاجة إنك ترمى اللوم على جماعة غير معروفة
الهوية و الأسهل من رمى اللوم كمان و كمان إنك تشكل لجنة تنبثق عنها لجنة يطلعوا بنتايج ما يرضاش عنها عقل طفل فى خامسة إبتدائى
المجلس العسكرى خبرته السياسية معدومة بشهادة أعضاؤه و بشهادة أخرى ضمنية من بعض أفراد مؤسسته اللى فضوا إعتصام ميدان التحرير بالقوة و حاكموا النشطاء السياسيين و دهسوا الناس بالمدرعات...
الحل المنطقى الوحيد فى مخطط تدفق سريع الخطى يبدأ بإنتخابات برلمانية نزيهة لا تزاوج فيها بين دكتاتورية الأغلبية و إغفال صوت الأقلية يعقبها تشكيل لجنة تأسيسية لدستور حقيقى يكفل حقوقا حقيقية للمواطن المصرى و ينتهى برئيس مدنى منتخب نستطيع أن نعامله بالقانون
عقلى الباطن و أخوه الواعى مش عايزين يدرسوا خالص إحتمالات فشل مخطط التدفق كله أو خطوه منه لما قد يترتب على هذا الإحتمال من شلل فى أحد الأطراف أو ما هو أسوأ
مصر تستحق المدنية التامة و فى أقرب وقت ممكن
ـــــــــــــــــــــــــــــــــــــــــــــــ
ملحوظة على جنب
ما جبتش التايهة عارفه
2 comments:
للأسف الشديد المجلس العسكري حط نفسه في موقف لا يحسد عليه بعد أن وضعه الناس تاجاً على الرؤوس يوما ما دلوقتي هاين عليهم يضربوه بالجزم ... أنا بقى درست الاحتمالات لفشل مخطط التدفق و لانهيار السد .. و الحمد لله ان الحكاية لسه ما انفجرتش ... الواقع أنا شايف أن رئيس الوزارة يمسك مهام رئيس الجمهورية لحين انتخاب واحد هو حل أفضل بكثير في حين يكتفي الجيش بسد خانة الأمن فحسب .. ( ادي العيش لخبازه ) و في نفس الوقت دع ما لقيصر .. لقيصر .. ما يجيش بقى قائد الجيوش عايز يمشي مجلس الشيوخ على مزاجه .. ده يبقى فيلم هندي مش رواية اغريقية
.....
من الواضح اني ما بدخلش على مدونتي كتير ، و من الواضح اني من كتر الهرس اللي في دماغي مش عارف أسلك موضوع واحد أكتب فيه
و من الواضح أكتر اني محتاج آجي هنا شويه كمان .. و أمحتاج أسمع فيروز عشان قربت أنسى صوتها
فنكوشنا
المجلس العسكرى مولع فتيل صبرنا من الناحيتين و واقف يتفرج....لا بيفهموا فى السياسة و مش شايفه خطوات لإنهم يحاولوا يفهموا فيها....عايزين يقعدوا و يرحرحوا بعدين نبقى نتكلم...أو ما نتكلمش ..مش فارقة معاهم كتير
طيب رئيس وزراء يمسك مهام رئيس البلد دى لحد ما الأمور تترستق كده...حد نضيف...حد بيفهم و نتفق عليه...مش هقول غير يا مسهل يا رب..يمكن نتشجع أكتر ع الخطوة دى بعد إنتخابات مجلس الشعب اللى مش عارفين لسه ظروفها إيه
الهرس اللى فى نافوخك ما ينفعش يكتمها...ده يخليها تتكلم..هيبقى هرسه و قلة كلام...ده يبقى كتيـــر
سلامات يا أدهم....سلامات كتير
:))
Post a Comment