Thursday 16 October 2008

ابـــن النــــــاظـــر

أمسية الخميس....نهاية الأسبوع..و كما تجرى العادة لا شئ جديد أفعله سوى أن أجلس على كرسىّ المفضل و أسترجع أحداث الأسبوع الطويل المرهق الذى ان راجعت أحداثه جيدا سأكتشف أننى لم أكن مشغولة اطلاقا و لكن شعور ضيق الوقت والانشغال كان يلاحقنى بصورة مستمرة
بعدها بقليل تجدنى فى الشرفة أحتسى أى شئ أسود (بمعنى آخر أى شئ يحتوى الكافيين ضمن مكوناته الأساسية) لا شئ يعطينى وضوح لمعالم الأشياء مثل الكافيين...

أتجول فى الشقة من هذه الغرفة لتلك...لأستقر فى النهاية أمام التلفاز..ليبدأ بعدها المرح ...سيدة بدينة تقوم بتحريك(كرشها) يمنة و يسرة فى حركات مبتذلة يمكن أن نشبهها برقصة فيل الماموث أثناء موسم التزاوج لأكتشف بعد دقيقتين من ذاك الفاصل المنقرض...أن المدام أو الآنسة من شمال روسيا و تعشق الرقص الشرقى...و تعتبره فن صعب التعلم كما أنه يصقل الشخصية...الى جانب أنها تحلم بأن تكون بطلة برنامج هزى يا نواعم لهذا الموسم....ضغط دمى المنخفض بطبيعته يبدأ بالارتفاع و يخرج عقلى من أذناى فى حركة شبيهة بأفلام الرسوم المتحركة ليستنشق بعض الهواء.. تجحظ عيناى للخارج تعبيرا عن احتجاجهما لحجم الأذى المادى و المعنوى الذى سببته لهما

برنامج سخيف يحلل سيكولوجية الأب الذى قتل زوجته و ابنته ثم مات منتحرا...تجد الاندهاش يعلو وجوه المحليلين النفسيين و هم يضيفون.."ليــــــه ينتحر؟؟؟...كل مشكلة و ليها حل"...ثم تجد الترهات المعتادة عن السيكولوجية المضطربة و الجهل السائد و خط الفقر و الحكومة وانفلونزا الطيور

نشرة الأخبار و مذيع متأنق يبدو عليه أنه لم يذق فى حياته أبدا الفول أو العيش البلدى ...تجده يحدث المواطنين الطبيعين عن أزمة البورصة و تأثيرها على مستوى الفرد الاقتصادى فى مصر...هئ هئ...طيب البورصة و هنعديها...مستوى اقتصادى ايه بس يا عمنا؟؟؟

فى قناة ما مستضيفين الممثل الفلانى بيسألوه عن آخر أعماله فى شهر رمضان...

شخص ما يتحدث عن قناعته بأن مصر تتحرك للأمام و أن ما نواجهه الآن ليس الا بعض الصعاب البسيطة التى تحاول قلة قليلة مندسة تضخيمها....حيث كده بقا أنا و كتير عايزين اعدام بالبلغ فى ميدان عام

تكريم الدكتور مصطفى السيد فى أمريكا بلد العلم و العلماء بحصوله على أرفع وسام امريكى فى العلوم لاكتشافه كيفية شفاء سرطان الجلد بنسبة 100%...كان فى استقبال سيادته سيادة الدكتور هانى الناظر....والله ده كان نص الخبر بالحرف...ليطل علينا ابن الناظر ليؤكد على أهمية البحث العلمى و ينخرط فى حديث طويل عريض عن تشجيع مصر للعالم فى بلاد الغربة و انها كانت سبب انطلاقته لأمريكا لما بعتته فى بعثة و التكريم ده أقل واجب نعمله للدكتور اللى مشرفنا و يشكر أمريكا على مجهوداتها...و يذهب ليحتفى بالعالم الجليل فى انتركونتيننتال سيتى ستارز

أنهى هذه الأمسية الرائعة و انا ساخطة على كل لحظة أمضيتها و أنا أحطم اعصابى أمام ذاك الشئ...فعلا ده كتيــــر والله

5 comments:

صابر وراضى said...

وعليكم السلااااااااام
طيب هو يوم الخميس دل مفيش فى عشا؟؟؟؟
ولا دى كمان حاجه على جنب بردو؟
انا هنصحك نصيحه ليوم الخميس
اوعى تشربى شاء يوم الخميس فى البلكونه احسن يحصلك زى ما حصل لعبد اللطيف صاحبى

zemos said...

40قرش..
؟؟؟؟
مفيش نظام أقاليم هنا؟؟؟

متخيل .... جدا..... ما حدث... لك.... ليلتها

HeBa said...

تصدقي إن أنا برضه تقريبا لفيت اللفة بتاعتك دي بس الفرق أني مشوفتش لقاء الكتور مصطفى السيد

سيبك من موضوع الممثل وموضوع الدكتور مصطفى السيد

وخليكي في هزي يا نواعم

والله أحنا نستاهل كل اللي بيجرالنا

مسابقة للرقص الشرقي

ببرنامج وميزانية ولجنة تحكيم

والبرنامج يشل أصلا

من السنة اللي فاتت وهو مستفزني أوي بصراحة

مصيبتنا الكبرى هي التقليد

كل البرامج دي ماهي إلا أفكار مقتبسة من الغرب

ولما بتتعرب بيبقى دمها بايخ ومالهاش طعم

نصيحة
ما تبقيش تسهري ليلة الخميس تاني

النوم أفيد

HeBa said...

ايه فينك

واحشاني

ياريت تطمنينا عليكي

OldCatLady said...

هبـــة:
موجودة يا جميل...بس مفيش حاجة على بالى أقولها اليومين دول

تشكرات من هنا للصبح على سؤالك..
خالص تحياتى يا جميـــل

:))
ـــــــــــــــــ

ملحوظة على جنب:

متشكـــــرين لكل اللى عدى و ساب تعليق...منورينّى دايما
صابر و راضى
مورو..لا مفيش هنا أقاليم يا برنث
هبة تانى :)

سؤال بقا لصابر و راضى::
الا قولى هو عبد اللطيف عامل ايه دلوقتى؟؟