ولاد ال نــــاس

هـــم مرة أخرى.......ولاد ال ناس دول مصرون على اتلاف أعصابى تماما

لعلك تتسائل من هم ولاد ال ناس دول؟؟....حسنا ومضات خاطفة عنهم و ستنتهى الحكاية....و سأخرس لفترة أخرى طويلة لا يعلمها الا الله

أمسية خميس أخرى....ملل قاتل.....كوب من الشاى كفيل باحداث أجدعها قرحة معدة......تلفاز يومض باستمرار(القنوات بتتقلب يعنى)....و حظى يقف على قناة الال بى سى....اتنين ولاد ناس قاعدين على كنبة ما فى صالة ما.....بيحلو مشكلة ما....هى بتلعب فى شعره و هو بيلعب فى صوابعها و مبرقين لبعض.......فقط لأكتشف أنهم مشتركين فى ستار أكاديمى....البهوات بعد كده عملو لعبة الأحكام بتاعتها ان واحدة من البنات تلف على كل اللى معاها و تديهم بوستين واحدة على خدودهم و التانية على ايديهم.....كلهم طبعا رفضوا مبدأ بوس الأيادى و مشوها خدود......ال آنسة لفت عليهم واحد واحد و واحدة واحدة......و جت على البيه ابن ال ناس....البوى فريند يعنى....و ادته بوستين.....عشان لا يزعل ولا يحس انه أقل من حد


الجامعة......كليتى.....المفترض انه مكان دراسة.....نجحوا فى جعله مكان للمقابلات و التسبيل.....والتنهيدات الى جانب حضور السكاشن


فى الفترة الأخيرة يعلم الله أننى حاولت أن أتوقف عن توقع الأسوأ... أصبحت فقط أتوقع أن يخرج أحدهم و يشير للكاميرا و يقولى بابتسامة سخيفة...تحبى نذيع ولا منذيعش...... لا يمل القدر من قذفى بمفاجآت كالزلط....أصدقاء يضربون بمبادئهم عرض الحائط.....أصدقاء لا يسمعون الا ما يريدون أن يسمعوا.....أمر بمواقف و يتم توريطى فى مواقف لا تعنى سوى شئ واحد أن هذه فعلا كاميرا خفية....و ان هى الا لحظات و سينقذنى صاحب الابتسامة السخيفة


فى الكلية......نازلة على السلم ..........و ألاقى فى وشى لوحة قد الهم متعلقة على الحيطة .....بتتكلم عن دكتور عندنا فى الكلية اسمه سعيد الفقى بتقول نظرا لأبحاثه المستمرة و استمراره فى العطاء لأبنائه الطلاب و جهود سيادته....قام بتكريمه أكبر هيئة تجمع لمعشر الصيادلة فى مصر ألا و هى نقابة الصيادلة نظرا لكفاح هذا الرجل محبوب الكلية و الجملة الأخيرة دى كانت مكتوبة بالبنط العريض.......و الأسرة اسمها أسره الفراعنة......غنى عن الذكر انهم سموه فرعون.....و برضو غنى عن الذكر ان ولاد ال ناس دول علقوا اللوحة قدام مكتب سيادته عشان يصطبح بيها كل يوم


______________________________

كلام على جنب

عايزة أقول ان كل عينات الناس اللى اتكلمت عنهم فى البوست دول طراطير بشهادة اتنين موظفين

دول و أمثالهم خربوها...... و فوق كده قعدوا على تلها زى ما بيقولوا

غنى عن الذكر انى لسه مستنية حد يقولى لو تحبى نذيع قولى نذيع و لو مش عايزة منذيعش