زى عوايدى دخلت على المدونة أشوف التعليقات.....شغالة تقليب فى دماغى يمكن ألاقى حاجة هنا ولا هنا أتكلم فيها.....بس دماغى واقفة عن العمل حتى اشعار آخر
لاقيت تعليق من حسام غانم بيقولى فيه بعد سلامات و ازيك....ليكى عندى تاج
أوبااا....حسيت انى اتبدست.....بس فرحت لأنى هأبعبع.....و البعبعة لا تؤدى لشئ سوى الراحة
زى ماحنا متفقين من التاج اللى فات....اربطوا الأحزمة....على من يرتدى العوينات أن يجلب خاصته و يرتديها...ممنوع التدخين لمن هم دون ال18
يالا بقا نبعبع
اسمك؟
أمانى نبيل
المشهور بيه وسط أصحابك؟
مونى.....أومانى....مانى
فى الغالب اللى نفسه فى اسم حتى لو مالوش علاقة باسمى بيقوله
سنك؟
19
اسم مدونتك؟
كلمتيـــن و بس
مجال دراستك؟
الصيدلة.....ربنا يكفيكوا الشر
الصورة الرمزية لمدونتك بتعبر عن ايــه؟
عن شكلى لما بصحى من النوم الصبح.....
:)
هل فكرت فى اغلاق المدونة؟ و السبب؟
لأ...
ايه رد فعلك لو حد قل أدبه عليك فى التعليق؟
أكيد هتضايق...بس فى الأول و فى الآخر أنا مقتنعة ان أفعال الشخص بتشاور عليه بصورة أو بأخرى
كده كده هيسكت بعد فترة فأتجاهله أحسن
أسوأ مدونة؟
مش فاكرة اسمها....كانت بتاعه واحد مقتنع ان كل البشر بقر و ان الحل الوحيد هو الابادة الجمـــــاعية عشان يرتاح من أشكالنا
هيحصل ايه للايميل بتاعك بعد مــا تموت؟؟
يا ساتر يا رب.....ولا حاجة...هيعدى عليه شهرين تقريبا و حسابى بعدها هيتقفل و كل الناس اللى عليه هيعرفوا بطريقة ما انى قابلت وجه كريم
اديت الباس وورد بتاعك لحد قبل كده؟
مــرة لصاحبتى عشان تفضى ايميلات من عليه
و بعدها غيرت الباس...و محدش يعرفها من وقتها غيرى
السفر بالنسبة لك؟
روحى فيه....مشكلتى انى مبسافرش كتير برغم انى بعشق السفر
بطلنا نسافر فى الصيف من سنتين و من وقتها و أنا مبحبش الصيف
بس بعدها اتعودت انى أروح القاهرة أغير جو و وشوش كل فترة...
أمنيتى الوحيدة انى يبقالى فرصة ألف العالم كله و أتعرف على كل أجناس الأرض و أعرف كل حاجة عن حياتهم و بعدها يحصل اللى يحصل بقا
المود بتاعك؟
متقلب جدا و عشوائى....أنا شخصيا مبفهملوش
بتعمل ايه فى وقت فراغك؟
وقت فراغى يا سيدى....طبعا بعمل أجدعها كوباية شاى.....و لو جايبة كتاب جديد بقعد أقراه...لو مفيش كتب جديدة يبقا كتاب قديم بحبه مقريتهوش من فترة طويلة و أشغل مزيكا رايقة فى الخلفية
ساعات أدور على النت على مقالات جديدة لأحمد خالد توفيق
أتفرج على فيلم حلو.....أوقات أقلب فى كراكيبى القديمة
أطلع أقعد على السطوح و أرسم شوية....أكتب....أو أقعد من غير شغلانة لو المود مش تمام
ممكن أغلس على القط بتاعى لو قاعد رايق
الأكلة المفضلة؟
مكرونة بالبشاميل
محشى كوسة و فراخ
بيتزا
جلاش باللحمة المفرومة أو بالجبنة الرومى و الزيتون
مكرونة بصوص البشاميل....أو بصلصة عادية بس تبقا معمولة حلو
أوووووف....أنا كده جعت
الصفات اللى ورثتها من والدك؟
تكبير الدماغ....و انى أحسب الموقف من كل النواحى و بجميع الاحتمالات
الصفات اللى روثتها من والدتك؟
سياسة النفس الطويل....و ممكن الصبر بس العصبية مش مساعدانى فى موضوع الصبر ده
أكتر ست حاجات بتكرهها؟
متقوليش ستة.....
قولى ما بتكرهيش ايــــه
:)
الغباوة و الأغبياء والمتذاكين
النفاق
الظلم
اللى بيتعامل معاك من منطلق انه أكثر مالا و أعز نفرا بمعنى أنه أسمى فكريا....ثقافيا....دينيا.....علما أو خلقا...النرجسيين عامة مبطيقهمش
الكذب
استغلال السلطة
المتحمسين بتعصب....المتفاءلين بتعصب....و كذا المتشائمين بتعصب...من الآخر بكره التعصب بكل صوره
أكتر ست حاجات بتحبها؟
الكتب و القرايه
السفر
تصليح الحاجات حتى و ان بوظتها أكتر
المزيكا
اللمة الحلوة بكل ما تحمل الكلمة من معانى....يعنى لا الناس تبقا قاعدة كارهة بعض و لا قاعدين بنجيب فى سيرة حد....ولا فى أغراض ملهاش لازمة من اللمة
أتعلم لغة جديدة
شخصيتك نوعها ايــه؟
عصبية....ملولة...كسولة..ساخرة...صريحة ...مرحة على ما تفرج
لماذا دخلت عالم التدوين؟
عشان ألاقى مكان يبقا بتاعى...أحط فيه أفكارى من غير ما حد ينتقدها..يزدريها أو يقولبها
و أشوف الناحية التانية من العالم....أشوف الناس اللى فى سنى و اللى اكبر منى دماغهم شكلها ايه
داخلة بغرض انى أشوف و أستفيد و أتعلم
أجمل كلمة قيلت فى وصف مدونتك؟
ان كلامى بيوصف ناس كتير و ان أسلوبى على طول بيتطور
أهمية التعليق بالنسبة ليك؟
بيخلينى أفكر الكلمة اللى كتبتها اتفهمت بكام شكل و لمست كام وتر
أحسن بوست كتبته و ليه؟ضع اللينك
أعتقد ان الأحسن لسه مكتبتوش....بس أنا بحب أنا و أنا بشرطة.....شيزوفرنيا .... لا شئ حقا لا شئ....فيروز و قطة و قصر الشوق...ادخل برجلك اليمين....شخابيط شخصية جدا
لأنى كتبتهم بمزاج و طلعوا من مواقف عشتها فعلا
أفضل بوست قرأته ؟و أفضل مدونة؟
حكايتى عند أنونيمس
بيان هام عند واحد مش فاهم حاجة
القاموس عند آدم المصرى
الأفكار البيض و أقاربها السود عند احنا بتوع الفنكوش
و أحسن مدونات قابلتها لحد دلوقتى هما اللى موجودين عندى فى لينك ناس عندها دماغ على ايدك اليمين
الانترنت بالنسبة ليك ايه؟
شباك بشوف بيه الناس الناحية التانيه بتعمل ايه
تمرر التاج لمين؟
لكل الناس اللى عينها فيه
بس خلاص...
9 comments:
لأ مش هاهرب ....
بس أحجز مكاني كأول تعليق
زى ماحنا متفقين من التاج اللى فات....اربطوا الأحزمة....على من يرتدى العوينات أن يجلب خاصته و يرتديها
تمام يافندم
مجال دراستك؟
الصيدلة.....ربنا يكفيكوا الشر
ربنا يوفقك
ايه رد فعلك لو حد قل أدبه عليك فى التعليق؟
أكيد هتضايق...بس فى الأول و فى الآخر أنا مقتنعة ان أفعال الشخص بتشاور عليه بصورة أو بأخرى
كده كده هيسكت بعد فترة فأتجاهله أحسن
قمة الحكمة
المود بتاعك؟
متقلب جدا و عشوائى....أنا شخصيا مبفهملوش
يبدو أني مش لوحدي في العالم بالشكل ده
ساعات أدور على النت على مقالات جديدة لأحمد خالد توفيق
فين ؟؟ لأني بموت في أسلوب الراجل ده
بجد أكثر من رائع
حتى وهو بيكتب دراما و أحداث حزينه بيهرج ، بجد مالوش حل
الأكلة المفضلة؟
بالهنا و الشفا
اللى بيتعامل معاك من منطلق انه أكثر مالا و أعز نفرا بمعنى أنه أسمى فكريا....ثقافيا....دينيا.....علما أو خلقا...النرجسيين عامة مبطيقهمش
هؤلاء لا يتوقفون إلا عندما تكشفينهم أمام أنفسهم و أمام الناس أنهم " ولا حاجة " و مايعرفوش حاجه أساساً في الحياة
أحسن بوست كتبته و ليه؟ضع اللينك
أظن ممكن الشخص يعرف معلومات عن تفكير اللي قدامه من معرفة الأحسن من وجهة نظره
أكيد هعدي عليهم و أشوف الدنيا عامله ازاي
أفضل بوست قرأته ؟و أفضل مدونة؟
الأفكار البيض و أقاربها السود عند احنا بتوع الفنكوش
أخجلتم تواضعنا
^_^
تمرر التاج لمين؟
لكل الناس اللى عينها فيه
أنا أعترف أنا عيني فيه
ههههههههههههههه
ايه الجمال ده
عارفه حسيتك انسانه محدده انتي عايزه ايه من الدنيا
عارفه ما شاء الله اختياراتك ومحدده بدقه الحجات الي بتحبيها وبتكرهيها
عجبتني اجباتك اوي
ماعدا محشي الكوسه مش بحبه ابدا
كل تاج وانتي طيبه ياقمر
max.adams:
مبدئيا كده منورنا يا بيه
شوف يا سيدى هتلاقى لأحمد خالد توفيق مقالات و قصص على موقع روايتى و كام قصة و مقال على بص و طل و فى له قصاصات صالحة للحرق أنا جبتها من على موقع هقولك عليه بس لما أفتكر أنا حاطه اسمه فين
:))
مودنا العشوائى ده لو عايزين نشوفلنا حل فيه هيبقا بسياسة النفس الطويل و العلام الكتير و تجربة كل حاجة
و فى وقت ما هتلاقيك كونت شخصية مميزة بمود مميز قد يكون ثابت
بالنبة للعالم النرجسيين دول...هأجرب نصيحتك فى أاى تعامل مستقبلى و ربنا يكرم
:)
و بما انك عينك فى التاج يبقا أنت اتدبست و الله ماهو رااااجع
و مستنية أعرف رأيك فى البوستات القديمة
و المواقع أهى
www.rewayty.com
www.boswtol.com
و سلامات
Mony Elshreef:
تسلمى و نورتينى يا جميل
و يارب أشوف تعليقات منك دايما كده
:))
لا اجابات جميلة يا أماني
وواضح جدا تأثرك بأحمد خالد توفيق
الراجل ده أثر على جيل كامل من الشباب
وكمان متفقة معايا في حاجات كتير
وإن هذا لشيء جميل
اه وأنا كمان عايز القصاصات :)
تحياتي ليكي يا أماني
حسام غانم
دبستنى أنت.....بس تدبيسة زى الفل
شوف أنا أجاوب فى تاجات آه
امتحانات متلاقينيش
بتلاقى فى ورقتى مزيج من الشخبطة الممزوجة بمصطلحات صيدلية لم تخترع بعد
:))
أحمد خالد توفيق ده الكاتب الوحيد اللى خلانى أتبنى آراءه و كأنها آرائى أنا
ربنا يحميه
و عملية البحث عن موقع القصاصات مازالت مستمرة وسط كراكيبى
:)
تحياتى
منورنى
ثانكيو توو متش
بس تقريباً موقع رواياتي مقفول مش عارف ليه
وشكراً
max.adams
احنا بس نحب نخدم
روايتى ساعات بيعلق بس أنا كنت لسه فاتحاه من يومين
نورتنى تانى
:)
Post a Comment