مساء الخير يا رب،
أكتب إليك و أنا نصف نائمة.. لذا أعتذر عن ذلاتى مقدما.
إنهم يقتلون القطط و يضربونها بالرصاص و يساوون أجسادها بالطريق بعجلات سياراتهم الجديدة. إنهم يضايقون الزراف حتى الموت.يرجمون الكلاب حد التعجيز. يرضيك كده يعنى ؟
أعلم أنها ليست بجملة افتتاحية شديدة التهذيب للخطاب. لكنه من عشمى، أعلم أنك تعلم كل هذا بدون أن أرهق أصابعى و أكتب لكنى فى حاجة للحديث معك خارج حدود أحلام النوم و صمتى الذى استبدل همهمتى بالقرآن فى الصلاة.
عايزه أشكرك على ورقة الاحتمالات اللى خلعتها إمبارح من على واحدة من حيطان الاوضه ..الورقة اللى ما عداش عليها أربع شهور إلا و كنت مشطبّة على كل حرف فيها. شكرا على كل حمل كنت كاتباه فيها و رفعته من على كتافى برحمتك.
اللوحة الكبيرة اللى مليانة إحتمالات جديدة و علقتها فوق سريرى إمبارح بقا مش قلقانة عليها.. متأكدة إنك هتصرّفهالى برضو برحمتك .. و عليه شكرا و حمدا مقدما.
يا رب.. شكرا على تهوين الأيام.. على شغلى الجديد اللى لسه ما أعرفش آخره إيه.. على أمى و أبويا.. على قططى.. على الكتب اللى مالية الاوضه.. شكرا على إنك موجود.
شكرا على اللخبطة اللى بتوصل لليقين.. و شكرا على نعمة اللامبالاة و نعمة ال"مالناش دعوة".
شكرا على الدمعتين اللى رزقتنى بيهم فى وسط الصلاة النهارده بعد 7 شهور من التناحة.
عارفة إنك مش هتنسانى و هتدينى أفكار أكتبها.. فمش هاطلب و لو إنى طلبت خلاص.
يا رب، شكرا على سمعك الذى لا يشغله سمع عن سمع.
وسلام على المرسلين و على من أرسلهم.
2 comments:
بساطة الكلام تعني انه طالع من القلب و دي أهم حاجه في مخاطبة رب الأرباب ، و صحيح هو عارف اللي فينا منغير ما نسأل
في حديث قدسي جاء فيه ما معناه " من شغله ذكري عن مسألتي ، أعطيته أفضل ما أعطي السائلين " ربنا يتقبلنا جميعا :)
...
حاجه بسيطة على جنب
الكلمة "موجود" اسم مفعول تعالى الله عز و جل عن ذلك :) ربنا سمى نفسه "الواجد" على وزن فاعل
:)
أدهم .. ليك وحشة و الله :)
واجد و موجود و واحد و ألف حمد ليه على إنه قريب :)
سلامات من هنا لباب بيتكوا
Post a Comment