العيد السنة دى

الساعة الخامسة و النصف صباحا ...تجدنى متنبهة قبل الصلاة بساعة على الأقل...أحدق فى السقف و أستمع الى التكبيرات مختلطة بأصوات أمى و أبى المتضاحكة...أعلم أن أبى الآن يقص على أمى ما كان يفعله من مقالب و هو صغير صبيحة العيد...لأكن صادقة لا أحد منا يمل سماع نفس القصص حتى و لو للمرة المليون
عادة عندى أن أظل فى سريرى متظاهرة بالنوم حتى أسمع صوت خطوات
أبى متجه الى غرفتنا لأسمع بعدها ندائه المعهود "يا بنات..اصحوا يالا باقى ربع ساعة على الصلاة"..تجدنى أتمتم فى سرى تانى يا بابا دايما كده تصحينا متأخر...و يبدأ الجنون

اوعى يا بت أنا اللى هدخل الحمام الأول كل مرة تدخلى تنامي لنا جوه و نتأخر على الصلاة......لااااااااااااء...ده دورى أنتى دخلتى الأول العيد اللى فات..أقف مذهولة...العيد اللى فات؟؟...و هـــــــوب فى ثوانى ألاقيها فى الحمام...آه يا نصابة..أنتظر دورى فى الحمام لأكتشف أن الساعة أصبحت السادسة و عشر دقائق....عاااااا...ده الصلاة بعد خمس دقايق..أمى دوما هى آخر من يتوضأ قبل الصلاة...و برغم كده تلاقيها دايما تلحق الصلاة قبل الاقامة...و احنا نقعد نلف ورا بعض....دايما تقول لى أنا وقتى فيه بركة

..أتوضأ..أرتدى ملابسى على عجل و أنا أتعثر فى كل شئ يقابلنى...الشماعة...شباك السرير...الدولاب...كل ده و أختى واقفة على الباب بعد ما لبست و خلصت كل حاجة...يـــــالا بسرعة....يالا انجزى....يالا اتأخرنا.....و أنا فى سرى آه يـــــا.....والله لو ما كان عيد كنت لفيت وراكى الشقة كلها بالشبشب.. قطتينى تتعجبا..علام يهرولان على الصبح كده...ده بدل ما يحطولنا سمك؟؟..عالم فاضية

أخرج من الغرفة لأجد أبى بابتسامة على الباب ليعطى كل منا شيئا ما لنأكله على عجل قبل الصلاة...كل سنة و أنتو طيبين يا ولاد...و أنت طيب يا بابا...أطبع قبلة سريعة على خده ثم أكمل بعدها مسلسل التعثر على كل درجات السلم لأجد نفسى فى الشارع... دوما لا أسترد هدوئى الا بعد الصلاة...دوما ما قبل الصلاة تجدنى مشوشة الفكر كمذياع بدون هوائى

أبدأ بتهنئة أختى أولا ثم أمى ثم أبى...لأجد أن أول مكالمة كالعادة ...أخويا...دايما ليلة العيد فى الشارع ..يصلى العيد و يفضل شوية مع صحابه و يجى....ازيك يا بت...كل سنة و أنتى طيبة..و يارب دايما مغلسين على بعض...ابتسامة عريضة تتسع لتشمل وجهى كله...و أتمتم فى سرى ربنا يخلينا لبعض


اللهم تقبل منا رمضان و كل سنة و أنتو بألف خير