من منطلق إن الأسئلة مش مؤذية بس قلتها هى الأذى بعينه....هسأل الكام سؤال دول
إحنا عملنا إعلان دستورى إنتقالى.....ماشى؟؟...طيب كان إيه بقا لازمنه الإستفتاء و تعديل مواد الدستور مادام كده كده فى إعلان دستورى هيتعمل؟؟!!! ما دام الدستور ساقط ساقط.....ليه مش إعلان دستورى و بعدين دستور و بعدين إستفتاء على المواد الخلافية و فى خلال الوقت ده الأحزاب تتكون فى وجود قوانين تجرم إستخدام الدين لصالح السياسة و قوانين تجرم التزوير و بعدين مجلس شعب منتخب و بعدين إنتخابات الرئاسة على أساس الدستور الجديد؟؟؟؟
تفتكروا فعلا السنة الجاية دى اللى هنعمل فيها الإنتخابات و الدستور -بالإشتراطات الحالية- قد تثرى الحياة السياسية فى مصر؟؟
50% عمال و فلاحين و تعريف العامل و الفلاح منصوص عليه فى القانون....طيب همّا تعريفهم إيه؟؟!!..يعنى أجيب ناس يا دوب بتفك الخط تشكل نسبة كاسحة فى مجلس هيشكل لجنة تأسيسية لوضع دستور هيعمل مستقبل بلد؟؟ ليه أصلا 50 %؟؟
أنا معنديش مشكلة مع الجيش كأفراد.... و لا مشكلة مع المجلس العسكرى...مشكلتى مع بطء قرارات المجلس العسكرى.....عارفة إن مفيش حاجة هتتم بين يوم و ليلة....بس المغربى و عز و جرانة و العادلى اتقبض عليهم فى نفس التوقيت.....الباقى التحرك معاه بطئ ليه؟؟
الرئيس السابق فين من ده كله؟؟
الحوار الوطنى.....الكلام فيه على إيه بالظبط و مع مين؟؟؟
هى مظاهرة 25 أبريل بتاعه رجوع الريس المخلوع للحكم عشان يحتفل بعيد ميلاده بيننا دى بجد؟؟؟
أنا مش عايزة أروح لنظرية المؤامرة فى موضوع ماتش الزمالك ده....بس غصب هأروح هناك لو ملقيتش تفسيرات سريعة.....هو اللى حصل ده أسبابه إيه فعلا؟؟
هى شرطة المرور فين؟؟؟....الكيان الشرطى كده كله على بعضه فين؟؟
هو ليه الناس مش مقتنعة إن اللى حصل ده ثورة؟؟!
الأسئلة دى مش إستنصاح....ده أنا بس عايزة أفهم
ـــــــــــــــــــــــــــــــــــــــــــــــــــــــــــــــــــ
ملحوظة على جنب
د/أحمد خالد توفيق مريض......إدعوله بالشفاء
3 comments:
كلنا عاوزين نفهم
مش عارف انتي حاسة كدة ولا لأ
بس انا حاسس اننا ف لعبة كبييرة
وبيتلعب بينا من ناس احنا حاطينهم فوق مستوي الشبهات لعبة احنا مش فاهمنها
بالظبط كدة زي اللخبطة اللي كنا كلنا فيها ايام بداية الثورة ويوم ما النت رجع وكان كل الناس منقسمة وكله بيتخانق ف كلة
انا دلوقتي حاسس كدة
نظرية المؤامرة ف ماتش الزمالك اركانها واضحة جدا
كل الخلاف دلوقتي علي مين دبر المؤامرة دي
عاوزين نعرف واحد اتنين تلاتة هما اللي عملوها
الثورة المضادة شديدة اوي علي فكرة وبكرة هنعرف كلنا انها بتدار من ناس احنا واثقين فيهم
وربنا يستر
معلش سقط سهوا
ربنا يشفي الدكتور احمد خالد ويقومة بالسلامة
وان شاء الله الدعاء بظهر الغيب مستجاب
المرة دى مش متلخبطة خالص
المرة دى أنا مع وقفات الجمعة قلبا و قالبا
عشان لا ده إستقرار و لا دى عدالة... الشعب مسجون أكتر من البهوات المسجونين فى طره و البهوات اللى لسه بيتحقق و هيتحقق معاهم
الثورة لازم تكمل عشان معادش ينفع نوقفها
سلامات كده
Post a Comment