و لو فى الميه عســل

استيقظ كئيبا قليلا كديدنه فى الفترة الأخيرة.....دقات قلبه متسارعة بشكل يزيده كآبة و ما يوازى الآلاف من الأحجار تسكن هناك بين ضلوعه فوق قلبه....بالطبع هو لم ينم إلا قليلا....لا يمكن أن تغفو و قلبك و عقلك مثقلين إلى الحد الذى يجبرك على أن تستيقظ كئيبا هكذا...

ينهض فى خفة مفتعلة ليذهب إلى الحمام....يغسل وجهه و يتوضأ ثم يتذكر أنه كان يريد أن يقضى حاجته فيفعل ثم يتوضأ مرة أخرى ..يخرج من الحمام ثم يشرع فى قراءة أذكار الصباح ...ينهيها و يصلى ركعتين ثم يلفت نظره ذلك الخاتم اللامع المستقر فى إصبعه الأيمن.....ثم يتذكر أنها - الهانم- مازالت غضبى كعادتها منذ الأمس.....يهز رأسه فى لا مبالاة ممزوجة ببعض من الطفولية ....عايزة شقة بحمامين زى تافى صاحبتها!!!....و مخنوقة منى عشان بقول إيه بدل سورى.....هههههههه.....يخرب عقلها بنت الإيه...فكاهية أوى

يقوم و إبتسامة متهكمة مازالت تخيم على وجهه....ليسأل نفسه فى المرآه فكرينى تانى كده إحنا كنا عملنا العملة السودا دى ليه؟؟....بحبها يمكن!!.....جايز

قام بتشغيل اللاب توب و وضع قائمة طويلة مكونة من بعض الأغانى التى تحسن من مزاجه دوما......لم يهتم يوما برأى الشيوخ الذين يتهمون من يسمع الأغانى بأنه وغد زنيم مثواه الوحيد النار....رفع الصوت قليلا ليستطيع سماعه من الحمام و هم ليحلق ذقنه التى أصبح شكلها مخيقا فعلا

لا أفهم ما المستفز فى أننى لا أرتدى تيشرت بينك أو سلسلة تحيط بعنقى الضخم!!.....و ما المستفز فى أننى لا أحب صديقاتها تافى و ديدا و نونى.....ما المستفز فى أننى أنا؟؟!
ينساب وقتها صوت الشيخ إمام إلى أذنه......البحر غضبان مبيضحكش أصل الحكاية متضحكش...ليدفعه إلى الدندنة معه بصوت عال قليلا

مساكين بنضحك من البلوه زى الديوك و الروح حلوة....سارقاها من السكين حموة و لسه جوا القلب أمل

ينهى حلاقة ذقنه سريعا و يذهب إلى غرفته ويمسك بهاتفه ليتصل بها....يأتيه صوتها المتناعس الممتعض قليلا ليخبره بأنه آلو
هو:صباح الخير....إزيك؟؟
هى-بامتعاض واضح-: نايمة....فى حاجة؟
هو:معندكيش كلية النهارده؟؟...أصلى عندى ساعة قبل الشغل و عاوز أعدى عليكى أديكى حاجة مهمة جدا
هى: معنديش كلية بس أنا و ماما فى البيت لوحدنا....مينفعش
هو-بابتسامة غلفت صوته-:عشان خاطرى....لو حتى تبصيلى من البلكونة و تنزلى السبت
هى:طيب طيب خلاص.....عارف لو حاجة مش حلوة
هو:سورى؟؟
هى-بصوت مبتسم إعتراه بعضا من الدلال البغيض-: بقولك هات حاجة حلوة
هو:أوعدك هتبقا حلوة ...لما أتصل بس بصى من البلكونة
هى: تنهى المكالمة

بينى و بينك سور ورا سور.....و أنا لا مارد و لا عصفور..فى إيدى عود قوال و جسور....و صبحت أنا فى العشق مثل....و صبحت أنا فى العشق مثل

يبتسم لنفسه إبتسامة شيطانية الإيحاء فى المرآه....يرتدى ملابسه فى عجالة...و ينزل إلى الشارع...يركب سيارته و يعرج على محل الزهور ليبتاع بعضها ثم يصل إلى منزلها....يخرج هاتفه ليتصل بها لتخرج إلى الشرفة ..تنزل السبت....يخلع خاتمه و يضعه لها فى السبت مع إبتسامة عريضة على وجهه لا يصدق كيف ارتسمت هكذا.....يصعد إلى سيارته و يقودها حتى المقابر ليضع بعضا من الزهور على قبر والده و البعض الآخر على قبر والدته و يقرأ لهما فاتحة الكتاب و يتمتم ببعض من الدعاء و يخبرهما بما فعل


يصعد إلى سيارته مرة أخرى فى حالة غريبة من إنعدام الوزن اللذيذ .....يديرها و يعابث مؤشر الراديو قليلا لينبعث صوت الشيخ إمام رائقا يخبره بأنه قللنا فخارها قناوى بتقول حكاوى و غناوى....يا قلة الذل أنا ناوى ما اشرب و لو فى الميه عسل....ما اشرب و لو فى الميه عسل

ـــــــــــــــــــــــــــــــــــــــــ
الملحوظة اللى على جنب

الكلام بالأحمر من أغنية البحر بيضحك ليه للشيخ إمام
فى أجزاء تانية بالأحمر ده حواره بصوت عالى مع نفسه


و دى البحر بيضحك ليه بصوت الشيخ إمام


ده لينك لنسخة تانية من الأغنية بصوت محمد محسن
http://www.youtube.com/watch?v=AwjFq7ejX_U&feature=related

أسئلة منطقية على درجة من السخافة

من منطلق إن الأسئلة مش مؤذية بس قلتها هى الأذى بعينه....هسأل الكام سؤال دول

إحنا عملنا إعلان دستورى إنتقالى.....ماشى؟؟...طيب كان إيه بقا لازمنه الإستفتاء و تعديل مواد الدستور مادام كده كده فى إعلان دستورى هيتعمل؟؟!!!  ما دام الدستور ساقط ساقط.....ليه مش إعلان دستورى و بعدين دستور و بعدين إستفتاء على المواد الخلافية و فى خلال الوقت ده الأحزاب تتكون فى وجود قوانين تجرم إستخدام الدين لصالح السياسة و قوانين تجرم التزوير و بعدين مجلس شعب منتخب و بعدين إنتخابات الرئاسة على أساس الدستور الجديد؟؟؟؟

تفتكروا فعلا السنة الجاية دى اللى هنعمل فيها الإنتخابات و الدستور -بالإشتراطات الحالية- قد تثرى الحياة السياسية فى مصر؟؟

 50% عمال و فلاحين و تعريف العامل و الفلاح منصوص عليه فى القانون....طيب همّا تعريفهم إيه؟؟!!..يعنى أجيب ناس يا دوب بتفك الخط تشكل نسبة كاسحة فى مجلس هيشكل لجنة تأسيسية لوضع دستور هيعمل مستقبل بلد؟؟ ليه أصلا 50 %؟؟

أنا معنديش مشكلة مع الجيش كأفراد.... و لا مشكلة مع المجلس العسكرى...مشكلتى مع بطء قرارات المجلس العسكرى.....عارفة إن مفيش حاجة هتتم بين يوم و ليلة....بس المغربى و عز و جرانة و العادلى اتقبض عليهم فى نفس التوقيت.....الباقى التحرك معاه بطئ ليه؟؟

الرئيس السابق فين من ده كله؟؟

الحوار الوطنى.....الكلام فيه على إيه بالظبط و مع مين؟؟؟


هى مظاهرة 25 أبريل بتاعه رجوع الريس المخلوع للحكم عشان يحتفل بعيد ميلاده بيننا دى بجد؟؟؟

أنا مش عايزة أروح لنظرية المؤامرة فى موضوع ماتش الزمالك ده....بس غصب هأروح هناك لو ملقيتش تفسيرات سريعة.....هو اللى حصل ده أسبابه إيه فعلا؟؟

هى شرطة المرور فين؟؟؟....الكيان الشرطى كده كله على بعضه فين؟؟

هو ليه الناس مش مقتنعة إن اللى حصل ده ثورة؟؟!

الأسئلة دى مش إستنصاح....ده أنا بس عايزة أفهم

ـــــــــــــــــــــــــــــــــــــــــــــــــــــــــــــــــــ
ملحوظة على جنب

د/أحمد خالد توفيق مريض......إدعوله بالشفاء

عندما تتحول متهيألى إلى (فلان) بيقول

أهلا بكم....أهلا بكم.....أقل ما يمكن أن أصف به طقس اليوم  أنه رائع إلى أبعد الحدود.....لا أعلم لم!! و لكنى أشعر بأننى أفضل حينما أرى مطرا غزيرا....و لا يعقل أبدا أن أصمت فى وقت كهذا لذا سأنهك عيونكم المقبلة بعد سويعات على نعاس هذه و أنسج تدوينة لا علاقة لها ببعضها البعض كما جرت العادة لذا عليكم إن شئتم أن تختلقوا لحبائل أفكارى المقطوعة هذة الأعذار

لم أكن أتوقع أننى يمكننى أن أعبث اليوم كل هذا العبث و أنا أقوم بمسح الشرفة من آثار الأمطار... تسليت بطرطشة المياه يمنة و يسرة و غنيت بصوت عال كالمخابيل ...و تسليت بمراقبة أحد جيرانى الجدد و هو يحاول وضع إستراتيجية لعبور بحيرات المياه فى شارعنا....و تساءلت عن قدرته على التسامح معى و تقبل سخافتى عندما جالت بخاطرى فكرة شيطانية تتلخص فى إلقاء بعض المياه عليه من أعلى و لكننى قدرت أنه لن يتمتع بروح دعابة من أية نوع ..خاصة و أنه لم يقابلنى فى حياته

كنت منذ يومين مع إحدى صديقاتى -المخطوبة حديثا- و لهذه الجملة الإعتراضية فائدتها ...نتحاور فى بعض الأمور لأجد أن كلمات مثل متهيألى و أعتقد و أظن و أفتكر.....تحولت إلى فلان - اللى هو خطيبها و بدون ذكر أسماء لأن إحتمال تكون المدونة متراقبة- بيقول و بيعتقد و بيفتكر .....قد يفهم بعض الخبثاء أننى أدعى أنها أصبحت تابعة... فقط لأقول لهم كفوا عن ظنكم السئ هذا أنا فقط أوضح ذاك التغير الإرادى الذى يطرأ على الفتيات بمجرد خطبتهن

لا أريد أن تختزل الثورة إلى

تكفير و تخوين و تسفيه من يخالفك فى الرأى تحت شعار أصلنا بقينا أحرار

أسعار ما قبل الثورة و ما بعدها
علمين و شوية بوسترات و كام يافطة مكتوب عليهم إرفع راسك فوق أنت مصرى
إشغالات طريق تحت إسم سبوبة و بنسترزق
 
فتاة محجبة و أخرى غير محجبة.....إنظر الصورة لتوضيح المثال








لى رأى لا يعجب إلا قلة ممن أعرفهم .....فى إعتقادى الشخصى أن لأية فتاة الحق فى أن تخلق حياة لنفسها أولا تعرف فيها ما تحب و ما تكره....تعرف لها عملا و تحدد لها مستقبلا ثم تقرر بعدها أو لا تقرر أنها بحاجة إلى الزواج أم لا....هل تصلح له أم لا ؟!!.....عليها أن تفعل ذلك ( من وجهة نظرى) حتى لا تكون إضافة لحياة زوجها......-أعر ف.. أعرف.. أعرف أن الحياة الزوجية مستقبلا فى حد ذاتها-  أنا يا أعزائى أتحدث هنا عن دمج حياتين لمحاولة خلق مستقبل مشترك لا إضافة إلى أحد الحياتين لخلق مستقبل قد يبدو مشترك


التدوينة خلصت على فكرة