صحتى تحسنت كثيرا.. عاد الانتظام إلى نومى أو هكذا أعتقد
عادت عادتى الليلية فى الطهو ثم الجلوس للأكل بمزاج و ليذهب الكرش الذى أخشاه إلى الجحيم
مساحتى الشخصية تعود بالتدريج و تعود معها قدرتى على الكتابة و الثرثرة
عدت للجلوس على سور الدور الرابع و دلدلة ساقىّ فى إتجاه الشارع مرتدية بنطالى المنقط.. وطظ فى الجيران
مش حلو الناس تدور فى فلكك على طول .. مش حلو تدور فى فلك الناس على طول
البؤس لم يذهب بعيدا .. و المشكلات ما زالت تتراكم لكن يبدو أن أسلوب تعاملى معها صار أفضل.. أو أسوأ..لا أدرى حقا ..لنقل أننى توقفت عن التشنج و صرت أهدأ فى التعامل مع الكثير من الأشياء
عايزه أتصور صورة حلوة.. رايقة.. مش ضرورى أبقى مبتسمة إبتسامة متكلفة أو إبتسامة صورة من اللى بيروحوا مصالح حكومية.. بخاف من التصوير و ما بحبوش.. يمكن عشان روحى مش مربوطة بروح اللى هيصورنى أو يمكن عشان أنا متأكدة إنه مش هيطلعنى شبهى أو شبه اللى أنا حاساه
لا أعلم لم توقفت عن سؤال الله دخولى الجنة.. صرت أطلب منه معرفته و محبته ..بس ده مش هينفى يعنى إنى طمعانة فى حياة أخرى لطيفة
السكينة و البصيرة يا رب.. و إنى أقدر أسند أهلى زى ما همّا سندونى و أبقى سبب فى فرحة و لو صغيرة ليهم
أشوف سيدنا النبى فى المنام و أتكلم معاه.. لو ينفع يعنى
رائحة الكمان و أنا أخرجه من الصندوق .. تجعل الفراشات تتزاحم فى معدتى
مش شاطرة خالص لسه فى لعب الكمان.. بس مبسوطة
ما أجيش على نفسى للدرجة اللى تخلينى أبقى شبه اللى بخاف منه.. آمين
لم أعد أريد شيئا مضمونا.. لم أعد أريد شيئا سيبقى و لم أعد أريد الإمساك بكل الخيوط.. أريد أن أمسك بما أريد و أحتاج منها فقط
Damage control .. محتاجة دوا بالاسم ده و هاتعاطاه و هامسّى بيه على حبايبى زى ما الناس بتعزم على بعض بسجاير بالظبط
ما بقتش عايزه أجرى عشان ألحق
زهدت الأسى على ما فات و عقدت سلمى معه تقريبا
عايزه أبطل أدور على حاجات باستماتة إلا لو عارفة إنها تستاهل و إنها مالهاش بديل
الرواية مش عايزه تكمل .. و ما أعرفش هتكمل ولاّ لأ .. بس مش مستعجلة.. أنا عايزه أرجع أستمتع بالكتابة زى زمان و كفى.. ما عنديش حاجة أثبتها لحد على العموم أو هكذا أظن
ـــــــــــــــــــــــــــــــــــــــــــــــــــــــــــــــــــــــــــــ
ملحوظة على جنب
قد يبدو الكلام ما يخصكش عزيزى القارئ.. لكنه يخصنى و جدا
مساء/صباح/تصبحوا على خير
No comments:
Post a Comment